Николай Викторович Андреев
(08.05.1974-18.06.2023)
Ньурба улууһун Акана нэһилиэгэр күн сирин көрбүтэ.
Оҕо эрдэҕиттэн тэтиэнэх, сыыдам уонна көхтөөх буолан сөбүлүүр да дьарыга, ситиһиилээх да эйгэтэ үгүс буолан испитэ. Ол эрэн оскуоланы бүтэрэр сылларыгар ахсааҥҥа дьоҕура баһыйар, 1991 сыллаахха Саха государственнай университетын Математическай факультетыгар туттарсан киирэр. Устудьуон сылларыгар уопсастыбаннай үлэҕэ тардыһыыта, спордунан дьарыга уостан-сүтэн хаалбатаҕа, төттөрүтүн, олоҕун инники омоон суолун быһаарарга, ситиһиилээх үлэһит буоларыгар күүс-көмө буолбута. Кини – түмээччи, көҕүлээччи этэ.
Ол курдук, 1996 сылтан саҕалаан Николай Викторович Саха сирин үөрэх ситимигэр олохтон барыар диэри үлэлии-хамсыы сылдьыбыта.
Идэтинэн үлэтин Ньурба улууһун Антоновка орто оскуолатыттан ахсаан учууталын быһыытынан саҕалаабыта. Манна 5 сыл буолан баран, Дьокуускай куоракка 31-с, 17-с уонна 7-с нүөмэрдээх орто оскуолаларга ахсаан учууталынан, Ньурба Аканатыгар оскуола дириэктэринэн үтүө суобастаахтык үлэлээбитэ. 2012 сылтан олохтон барыар диэри Дьокуускай куорат “Айыы Кыһата” Национальнай гимназияҕа ахсаан, кэлин ОБЖ учууталынан ситиһиилээхтик үлэлии сылдьыбыта.
Кини үөрэнээччилэрэ – куорат уонна республика предметнэй олимпиадаларын кыайыылаахтара, “Патриот” байыаннай-спортивнай оонньуу куораттааҕы түһүмэҕин 7 төгүллээх, республика “Байанай” спартакиадатын уонна Саха сирин спецнаһын күнүгэр аналлаах военизированнай эстафета 2 төгүллээх чемпионнара, Лаврентьев уонна Фелькер аатынан Куубак хаһаайыттара.
Кылаас салайааччытын быһыытынан олус уйаҕас, болҕомтолоох, сэргэх киһи этэ.
Кини 2015 сыллаахха “Дьокуускай куорат бастыҥ кылаас салайааччыта” күөн күрэскэ кыттан барыбыт үөрүүтүгэр кыайыылаах аатын сүкпүтэ. Ол салайбыт кылааһыттан үгүс-элбэх ситиһиилээх үөрэнээччилэр тахсаннар, билигин дойдубут араас муннугар баар куораттарга үөрэнэ-үлэлии сылдьаллар, оттон биир оҕото биһиги оскуолабыт историятыгар ЕГЭни 100 баалга аан бастакынан туттарбыта.
“Айыы Кыһата” оскуола атаҕар туруутугар, туспа дьиэлэнэн-уоттанан сайдан барыытыгар Николай Викторович үтүөтэ-өҥөтө улахан. Кини 2013 сыллаахха оскуолаҕа “Эрэл” байыаннай-патриотическай кулуубу тэрийбитэ, ити сыл кини көҕүлээһининэн атын оскуолаларга бастыҥ холобур буолар “Аҕа түмсүүтүн” күүстээх үлэтэ саҕаламмыта. Маннык саҕалааһыннар үтүө түмүктээх этэ: оскуола уратытын көрдөрүүгэ, ситиһиилээх үөрэнээччини иитэн таһаарыыга уонна төрөппүтү сомоҕолуурга тугунан да солбуллубат бигэ тирэххэ кубулуйбуттара.
Ити икки күүстээх хамсааһын оскуоланы ааһан, Дьокуускай куоракка оҕону сахалыы эйгэҕэ чугаһатыахха, угуйуохха сөп диэн санааны бигэргэппиттэрэ. Ол курдук, кини салалтатынан Аҕа түмсүүтэ сыллата тиһигин быспакка Муҥха, Куйуур дьарыктарын Нам улууһун Хомустаах нэһилиэгэр, сайыҥҥы өттүгэр Өймөкөөҥҥө, Таатта Баайаҕатыгар (“Мандар кыһата”) оҕо сайыҥҥы экспедицияларын тэрийэн кэллэ.
Байанайдаах булчут быһыытынан кинини элбэх киһи билэр уонна сүбэлэтэр этэ. Бу эйгэҕэ “Байанай” сурунаал редакциятын кытта ыкса үлэлэһэн республика араас тэрээһиннэригэр, бырайыактарыгар элбэх оҕону кытыннарбыта. Булчут, балыксыт эйгэтин оскуолаҕа тэрийэн, оҕолору, төрөппүттэри булт эйгэтигэр төрүт үгэстэргэ угуйбута, элбэх киһини сыһыарбыта, онно анаан оскуолабыт саамай сиэдэрэй көстүүлээх муннугун олохтообута. Саха политехническэй лицейын кытта кэпсэтэн үгүс выпускниктар массыына ыытар права ылалларыгар көмөлөспүтэ.
Николай Викторович Андреев дьоһун үлэтэ, сыралаах дьарыга халтайга хаалбатаҕа. Үтүмэн үгүс грамоталарын, махтал суруктарын истэригэр – Ил Дархан грамотата, Ф.А.Поморцев аатынан юнармейскай мэтээл уонна илиитигэр туппакка хаалбыт “Саха АССР 100 сыла” үбүлүөйдээх мэтээл, “Россия үөрэҕин эйгэтин бочуоттаах үлэһитэ” үрдүк аат кинини туруу үлэһит, дьиҥнээх учуутал, оҕо таптыыр үөрэтээччитин быһыытынан көрдөрөллөр.
“Айыы Кыһатын” дьоно-сэргэтэ.